Kryetarja e Grupit të Demokratëve, Rudina Hajdari, në fjalën e saj mbajtur në Kuvend, ka shpërthyer në revoltë të hapur pas aludimeve se presidenti Meta mund të shpërndajë Parlamentin. Me tone të larta, ajo tha se presidenti Meta nuk ka kompetenca që të shpërndajë Kuvendin, dhe se kjo ndodh në dy situata që janë të parashikuara në Kushtetutë.
“Nëse mendoni se ky Parlament do shpërndahet, atëherë presidenti ti thotë burgut hapu! Ai nuk e ka kompetencë të shpërndajë Parlamentin. Shpërndarja e Parlamentit ndodh në dy situata, dhe është e parashikuar në Kushtetutë”, tha ajo.
Meta deklaroi se do të ç’dekretonte 30 qershorin si datën për mbajtjen e zgjedhjeve vendore, gjë e cila solli përplasjen e tij me mazhorancën, ndërsa kjo e fundit nisi procedurat për ta shkarkuar nga detyra. Mazhoranca votoi në Parlament një rezolutë, ku kërkohej shkarkimi i presidentit Meta, por ky i fundit nuk qëndroi në heshtje.
