Situata aktuale politike në vend lë shumë për të dëshiruar dhe pa mëdyshje mund të thuhet se vendi është në krizë.
Kreu i Shtetit Ilir Meta pak ditë më parë shfuqizoi dekretin e zgjedhjeve, ndërkohë kryeministri Rama çdo ditë e më shumë shprehet i vendosur për të realizuar zgjedhjet më datën 30 qershor.
Nga ana tjetër kreu i PD-së Lulzim Basha ka deklaruar se më datën 21 qershor do të zhvillohet një protestë kombëtare e opozitës.
Ndërkohë mbrëmjen e sotme ish-kryeministri Sali Berisha ishte i ftuar në emisionin “Tempora” në “RTV Ora” prej ku u shpreh se kurrë nuk do të shkonte në zgjedhje pa opozitën, duke thumbuar kështu Edi Ramën.
Pjesë nga biseda:
Berisha: Ky president ndryshoi datën e zgjedhjeve pas 5 precedentësh.
Meço: Që kishin ardhur pas një marrëveshje politike dhe një vendimi parlamenti. Asnjëherë në mungesë të marrëveshjes.
Berisha: Alfred Moisiu ndryshonte datën pa pyetur fare. Pyeste vetëm Edi Ramën. Edhe atëherë unë isha i vendosur që në zgjedhje të mos shkoja pa opozitën dhe nuk bëja luftë me presidentin.
Meço: Sikur opozita të kishte marrë një vendim, kur ishit ju në pushtet si opozita e sotme do kishte shkuar në zgjedhje?
Berisha: Kurrë nuk do të shkoja në zgjedhje. Zgjedhjet nuk janë për qeverinë, por për partitë politike.
Meço: Pse nuk do shkonit?
Berisha: Zgjedhjet nuk janë vetëm procedurë, por janë edhe substancë, kur ka alternativë.
