Të gjithë ne, mund të goditemi në një moment të jetës nga ndonjë fatkeqësi natyrore. E rëndësishme është të kemi forcën të dalim nga situata, pasi jeta vazhdon. Shembulli më i mirë vjen nga El Salvadori në Amerikën Qendrore.
Pas një tërmeti të fortë prej 7.6 ballësh disa vite më parë, që shkaktoi qindra të vdekur, 87-vjeçarja, Maria Ponce nga El Borbollon, mbeti e pastrehë. Shtëpia e saj, u shkatërrua plotësisht. Por ajo nuk u ligështua. Vendosi pas disa ditësh të ndërtonte vetë një shtëpi tjetër, pa pritur ndihmën e autoriteteve.
Por shtëpia e saj e re, do të ndërtohej si jo zakonisht, me tulla dhe laç, por vetëm me shishe plastike. Për shtatë muaj, Maria mblodhi mijëra shishe të tilla. Të gjithë ata që e shihnin, mendonin se kishte lajthitur. Por ajo nuk donte t’ia dinte për fjalët e botës. Pas disa kohësh, arriti të ngrejë shtëpinë e re ashtu siç e kishte ëndërruar.
Tani shtëpia e saj e re vizitohet çdo ditë nga dhjetëra vizitorë, dhe 87-vjeçarja mbijeton pikërisht me paratë që lënë admiruesit e shtëpisë së pazakontë. “Nëse bie shi, shtëpia dridhet, por nuk bie. Por edhe nëse do të bjerë, nuk do të më lëndonte, sikur të ishte bërë me çimento”, thotë Maria.
