Presidenti Ilir Meta, edhe një herë tjetër i ka mëshuar fort faktit se Shqipëria ka nevojë për zgjedhje të lira e të ndershme. “Presidenti është zgjedhur nga Parlamenti, jo nga ky, nga një Parlament legjitim. Por Presidenti i takon Republikës. Besoj se jam i qartë. Shqipëria është Republikë, Presidenti i takon Republikës”, tha kreu i shtetit.
Kreu i shtetit shtoi ndër të tjera se po punojnë me qetësi e përgjegjshmëri, dhe se Presidenti mban shënimet e tij, lidhur me këtë ngërç që ka mbërthyer vendin. I pyetur për një datë të re zgjedhjesh, si dhe për një tryezë të mundshme mes palëve, Meta theksoi se kjo do të bëhet sa më parë të jetë e mundur. “Sa më parë të jetë e mundur po punojmë me shumë qetësi dhe përgjegjësi, dekreti është në fuqi, i detyrueshëm për të gjithë. Presidenti mban shënim”, deklaroi ai.
Po kështu, Meta u përgjigj me ironi se Presidenti nuk ndalon askënd të çmendet. “Dekreti mund të gjykohet edhe nga Gjykata e Skraparit, që nuk ekziston. Presidenti nuk ndalon askënd që të çmendet. Përkundrazi, i fton çdo të çmendur që në këtë ditë dhurimi gjaku ka nevojë. Shqipëria ka nevojë për zgjedhje të lira dhe të ndershme, vetëm ato çelin negociatat. Dekreti është i detyrueshëm për të gjithë. Presidenti ka të drejtë të bëjë thirrje çdo ditë për reflektim. Ata që ecin në rrugën e paligjshmërisë, do të kenë të gjitha pasojat që do të provokojnë paqen sociale”, tha ai.
