Ministri për Diasporën, Pandeli Majko ka deklaruar nga foltorja e Kuvendit se zgjedhjet pa opozitën nuk mund të cilësohen normale, me arsyetimin se regjimi mund të degradojë.
Sa i përket vendimit të presidentit Meta për të anuluar zgjedhjet vendore të 30 qershorit, ministri u shpreh se e gjen politikisht të drejtë aktin e tij, por nga ana juridike të gabuar.
“Zgjedhjet pa opozitën nuk mund të konsiderohen normale dhe ne rrezikojmë degradim në regjim. Kriza aktuale është pasojë e një politike opozitare që vepron: të gjitha ose asgjë, ky është një gabim i rëndë.
PS duhet të negociojë krizën aktuale dhe me trupën parlamentate e hyrë në Kuvend nga listat zëvendësuese e opozitës”, tha Majko.
Po ashtu, Majko theksoi se Meta është zgjedhur president nga votat e Partisë Socialiste, ndryshe nga çfarë ka deklaruar kryeministri Rama se: “Ilir Meta u zgjodh president me votat e tij dhe votat tona mund ta pengonin zgjedhjen e tij, po nuk mjaftonin për të zgjedhur një president pa Ilir Metën.”
