Një 35-vjeçar ka rënë në prangat e Policisë së Vlorës, pasi dyshohet se në muajin mars ka vendosur eksploziv në oborrin e banesës së babait të tij.
Duke iu referuar njoftimit të Policisë, i arrestuari identifikohet me inicialet E.O. Po ashtu, mbi të rëndon dhe akuza “Dhuna në familje”, pasi dyshohet se ka ushtruar dhunë fizike ndaj gruas së tij.
“Në vijim të punës intensive për kapjen e personave në kërkim, Seksioni i Krimeve mbështetur nga shërbimi “Shqiponja” pranë DVP Vlorë, bazuar në informacione të siguruara në rrugë operative, në zonën e Lungomares kanë bërë kapjen dhe ndalimin e shtetasit në kërkim E. O., 35 vjeç, banues në Vlorë.
35 vjeçari ka qenë i shpallur në kërkim, pasi në datën 30.03.2019, dyshohet se ka vendosur eksploziv në oborrin e banesës së babait të tij, për motive të dobëta.
Ndaj këtij shtetasi, rëndon edhe një vepër tjetër penale si “Dhuna në familje”, pasi bazuar në kallëzimin e dhënë nga vjehrra e shtetasit E.O, ky i fundit ka ushtruar dhunë fizike ndaj vajzës së saj më datë 09.03.2019”, thuhet në njoftimin e Policisë.