Kryeministri Edi Rama ishte sot në Dibër, në kuadër të fushatës elektorale.
Gjatë fjalës së mbajtur, Rama tha se Rruga e Arbrit do përfundojë në pranverën e vitit 2021, ndërsa u shpreh edhe njëherë i bindur se zgjedhjet e 30 qershorit do të zhvillohen, pavarësisht marrjes së vendimit nga presidenti Meta.
“Jo vetëm që do të zgjedhim kryetarët e bashkive dhe këshillave por do të vendosim një kufi të qartë mes 30 viteve të shkuara dhe atyre në vazhdim. Kanë frike të ballafaqohen me ne në zgjedhje. Këtu nuk është çështja të shtyjmë një dasmë por është çështja nëse ne do të pranonim të shtynim zgjedhjet do të hapim një rrugë pa krye në të ardhmen”, tha Rama.
Sa i përket shfuqizimit të dekretit të datës së zgjedhjeve, Rama deklaroi se Ilir Meta nuk e meriton të qëndrojë më në atë zyrë. Ndërsa e cilësoi vendimin e marrë nga Meta një vetëvrasje politike.
“Ajo që tha presidenti vlen po aq sikur të thoshte dje anuloj ndeshjen Islandë-Shqipëri, ka bërë një akt politik, se do të bëjë akoma do ta shikoni. Ka vendosur të na vendosë në një pozitë të sëkëlldisshme. Ilir Meta nuk e meriton më zyrën ku rri. Nuk e meriton më titullin e gardianit kushtetues. Ajo që bëri është nga pikëpamja politike një vetëvrasje, nga pikëpamja ligjore një nul dhe nga pikëpamja morale, një turp që do ti ngelë atij”, shtoi Rama.
