Ministri i Jashtëm, Gent Cakaj ka zhvilluar gjatë ditës së sotme takime me dy nga figurat më të larta politike të Parlamentit Evropian, Hahn dhe me Mogherinin.
Cakaj, gjatë postimeve të ndryshme në Twitter është shprehur se ata kanë diskutuar për situatën e brendshme në Shqipëri si edhe për përgatitjet për hapjen e negociatave të pranimit.
Në foton e parë të postuar me Komisionerin e BE-së për Politikat Evropiane të Fqinjësisë dhe Negociatat e Zgjerimit, Johannes Hahn, Cakaj shkruan se ata diskutuan për përparimet që Shqipëria ka bërë në çështjet kryesore duke theksuar në fund se tani Shqipëria meriton hapjen e negociatave të pranimit në BE.
“Kisha një takim të madh me Johannes Hahn në Bruksel sot. Diskutuam mbi përparimin e konsiderueshëm të Shqipërisë në pikat kryesore, situatën e brendshme, si dhe përgatitjet për hapjen e negociatave të pranimit. Shqipëria meriton hapjen e negociatave të pranimit në BE tani”, shkruan ministri i Jashtëm në Twitter.
Në postimin tjetër ai shihet në krah të Përfaqësueses së Lartë të Bashkimit Evropian, Federica Mogherini. Në takimin e zhvilluar në Bruksel ata diskutuan mbi avancimin e procesit të integrimit të vendit tonë, pas rekomandimit të Komisionit Evropian për hapjen e bisedimeve për anëtarësim.
Përfaqësuesja e Lartë përgëzoi Ministrin Cakaj për përsëritjen e rekomandimit të Komisionit për të hapur negociatat e pranimit me Shqipërinë, duke theksuar se kjo është një njohje e rezultateve të prekshme të reformës gjithëpërfshirëse për drejtësinë dhe të arritjeve të Shqipërisë në luftën kundër korrupsionit dhe krimit të organizuar.
Ajo riafirmoi bindjen e saj të fortë se Shqipëria është e gatshme të shkojë përpara në rrugën e saj të integrimit në BE dhe të hapë negociatat e pranimit.
