Konfirmohet në detyrë gjykatësi i Gjykatës së Apelit për Krimet e Rënda, Dhimitër Lala. Vendimi është dhënë pak minuta më parë në Komisionin e Pavarur të Kualifikimit.
Pas hetimit në të tri kriteret e rivlerësimit që janë pasuria, pastërtia e figurës dhe aftësitë profesionale, KPK ka njoftuar sot se gjyqtari e kalon sitën e Vettingut dhe konfirmohet në detyrë. Hidhen poshtë në këtë mënyrë pretendimet e vëllezërve Orik dhe Laert Shyti, të cilët ngritën pretendime se ndaj tyre, disa vite më parë ishte dhënë një dënim nën “korruptim politik”.
Gjyqtari Dhimitër Lara mori një relacion pozitiv nga Inspektoriati i Deklarimit dhe Kontrollit të Pasurive, sipas së cilit ai kishte kryer deklarim të saktë dhe nuk kishte fshehje të pasurisë apo konflikt interesi.
Relatorja u shpreh se nga 5 denoncime të kryera prej publikut, është veçuar një prej tyre që është kryer nga shtetasit O.Sh. dhe L.Sh., që sipas tyre janë akuzuar padrejtësisht si anëtarë të organizatës “Hakmarrja për Drejtësi”. Sipas Komisionit, denoncuesit kanë pretenduar se gjyqtari është korruptuar politikisht dhe se ka probleme me aftësitë profesionale. Në lidhje me këto, por edhe me gjetje të tjera, gjyqtari Lara tha se nëse do të kthehej pas, nuk do bënte asgjë ndryshe.
