Në fund të qershorit Shqipëria do të marrë përgjigjen e shumëpritur nga të gjithë qytetarët, nëse më në fund do të çelen negociatat për anëtarësimin e saj në Bashkimin Evropian.
Vendimi do të merret në mbledhjen e Këshillit Evropian, ndërsa duhet thënë se ky është një vendim mjaft kompleks teksa lidhet me një sërë faktorësh.
Qeveria shprehet optimiste duke nënvizuar se Shqipëria i ka kryer detyrat e saj, por nga ana tjetër jemi përballë një fakti që e penalizon vendin tonë, duke qenë se kemi ulje të numrit të azilkërkuesve, por jo zhdukje të këtij fenomeni.
Por, çfarë mendojnë shqiptarët lidhur me vendimin e qershorit, a do të hapen negociatat?
Tirana Today pyeti qytetarët në një sondazh, lidhur me rrugëtimin e Shqipërisë drejt Bashkimit Europian.
1115 votues morën pjesë në sondazhin me pyetje “A mendoni se Shqipëria do të marrë një “PO” dhe do të çelen negociatat në muajin qershor?”, përgjigjet e të cilëve ishin:
JO – 617 vota ose 55,34%
PO – 498 vota ose 44,66%
Duke llogaritur mënyrën e votimit në këtë sondazh, mund të themi se qytetarët janë disi skeptikë lidhur me çeljen e negociatave në muajin qershor.
Gjithsesi, mbetet të presim dhe pse jo, të shpresojmë për një përgjigje pozitive që i hap rrugën integrimit të vendit tonë në Bashkimin Evropian./ Tirana Today
