Sekretari për Mediat në Partinë Socialiste, Alfred Peza, është i bindur se zgjedhjet e 30 qershorit do të zhvillohen, pasi sipas tij, “nuk ka aq budallenj që të shkojnë në burg për të cenuar legjitimitetin e procesit”.
“Krimet elektorale në demokraci janë nga krimet më të rënda që mund të bëhen, për shkak se shenjtëria e zgjedhjeve demokratike është më e madhja”, theksoi Peza.
Në lidhje me ofertën për dialog të kryeministrit Rama ndaj kreut të PD, Lulzim Basha, Peza nënvizoi se “oferta për dialog e kryeministrit është në tryezë, dhe dora është e shtrirë çdo ditë”. Sipas tij, PD duke e mirëmenduar humbjen, po bëjnë lojën e strucit.
“Pasi humbën zgjedhjet e 2015 dhe 2017, e dinin që do të ishte humbja e tretë dhe në këto kushte po bëjnë lojën e strucit, pasi mendojnë se nëse nuk hyjnë, nuk quhet që kanë humbur zgjedhjet”.
Në lidhje me mundësinë për shtyrjen e datës së zgjedhjeve, Peza u shpreh kjo datë është vendosur nga Presidenti i Republikës. Peza tha më tej se nga ana e PS nuk mendohet që të negociohet për 30 qershorin.
“30 qershorin e ka vendosur Presidenti i Republikës. Nëse Kreu i Shtetit që e ka dekretuar këtë datë mund ta shtyjë, jemi të hapur. Nga ana jonë nuk e negociojmë 30 qershorin, por ata që e kanë në dorë mund të ulen të diskutojnë, nëse do të ulen ndonjëherë.
Ka një problem të madh me opozitën, e cila kundër këshillave të partnerëve tanë gjermanë, thotë që nuk ulemi në dialog me Edi Ramën. Sali Berisha vazhdon t’i qëndrojë vijës së kuqe që i ka vendosur opozitës, duke thënë që ose largohet Edi Rama, ose shkrihet opozita. Dhe nuk besoj se Lulzim Basha ka guxim ta shkelë këtë vijë të kuqe”.
