Një grup të rinjsh janë mbledhur gjatë mesditës së sotme para Ministrisë së Arsimit, duke protestuar për premtimet e pambajtura nga ana e qeverisë.
Nën thirrjet: “Duam të drejtat tona”, të rinjtë në shenjë revolte kanë ndezur një zjarr para ambienteve të Ministrisë. Më tej situata është agravuar, ndërsa kanë hedhur flakadanë, e më tej kanë djegur letra. “Turp, turp!”, ishin thirrjet që dëgjoheshin nga turma.
Dhjetorin e kaluar studentët e të gjitha universiteteve në Shqipëri, protestuan prej më shumë se dhjetë ditë para “Ministrisë së Arsimit” duke kërkuar më shumë vëmendje për problemet që kanë universitetet në të gjithë vendin. Vetëm pas premtimeve dhe fillimit të plotësimit të disa prej kërkesave të tyre, protestat u mbyllën.
