Prej 11 vitesh ndodhet në burg, fillimisht në Tajlandë, dhe më pas në SHBA, ku është dënuar me 25 vite burg, me akuzën e furnizimit me armë të organizatave terroriste. Por deri në vitin 2008, ish-ushtaraku rus Victor Bout, ka qenë trafikanti më i madh i armëve në botë.
Inteligjent, dhe me një nuhatje të lindur për biznes, Bout e pa shembjen e Bashkimit Sovjetik, si një shans të artë për të bërë para. Ai bleu me çmime qesharake 3 avionë transporti “Antonov”, dhe nisi trafikimin e armëve në vende të ndryshme të botës, kudo ku kishte konflikte apo tensione, që ishin gati të shpërthenin. Ai shiste armë në Afganistan, Angola, Kongo, Liberi, Pakistan, Filipine, Ruanda, Sierra Leone, Sudan etj.
Gjithçka e koordinonte kryesisht nga Emiratet e Bashkuara Arabe. Ai ia dilte të vepronte pa u dënuar, falë shumë pasaportave që zotëronte me identitete të ndryshme, por edhe mbështetjes nga njerëz të fuqishëm. Filmi i famshëm i vitit 2005 “Lord of the Wars”, me protagonist aktorin amerikan Nicolas Cage, është frymëzuar pikërisht nga Victor Bout.
Aktiviteti i tij 17-vjeçar, ka përfshirë edhe Shqipërinë gjatë viteve 1992-2003. Disa libra investigativë mbi “tregtarin e vdekjes”, përmendin nisjen e ngarkesave me armë nga Shqipëria në disa vende afrikane dhe sidomos në Kongo dhe Ruanda, ku gjatë viteve 1990 pati 2 luftëra civile të përgjakshme.
Të gjitha transaksionet, realizoheshin në çdo rast me ndërmarrjen shtetërore shqiptare të tregtisë së armeve, MEICO. Veç të tjerash, Bout u akuzua se kishte furnizuar me armë talebanët në Afganistan, dhe mbi të gjitha luftëtarët e Al-Kaedës. Në këtë rast, amerikanët nuk e toleruan, pasi organizata e drejtuar nga Bin Ladeni, ishte përgjegjëse për sulmet e 11 Shtatorit 2001 në SHBA./ Tirana Today
