Prokuroria e Krimeve të Rënda ka arritur të sigurojë numrat e telefonit që përdorën dy prej autorëve gjatë grabitjes në aeroportin e Rinasit. Dy aparatet celularë dhe kartat SIM janë blerë në tregun e zi. Këto të fundit rezultojnë të regjistruara në emër të dy personave invalidë.
Prokurorët, pasi kanë marrë dëshmitë e dy personave, kanë dalë në konkluzionin se nuk kanë lidhje me grabitjen. Identifikimi i numrave u bë në bashkëpunim me kompanitë celulare.
Ndërkohë që për prokurorët mbetet ende e paqartë mënyra se si janë përfituar kartat e identitetit të dy personave të tjerë.
Për grabitjen janë arrestuar gjashtë persona. Ata janë Fatjon Beqiraj, Alkon Bengasi, Renaldo Sula, Saimir Çela, Oltian Veseli dhe Ragip Hajdini. Në ditën e grabitjes, njëri prej grabitësve, Admir Murataj, mbeti i vrarë gjatë shkëmbimit të zjarrit me policinë. Ai konsiderohet nga hetuesit si një nga ideatorët e vjedhjes së parave.
