Komisioneri Evropian për Politikën e Fqinjësisë Evropiane dhe Negociatat e Zgjerimit, Johannes Hahn ka thënë se Maqedonia e Veriut dhe Shqipëria mund të shpresojnë për hapjen e negociatave me BE pas zgjedhjeve evropiane.
Gjatë një interviste për gazetën gjermane “Handelsblatt”, Hahn është i bindur se Komisioni i BE-së do të paraqesë rekomandime pozitive për të dy vendet në fund të majit.
“Unë jam i bindur se Komisioni i BE-së do të paraqesë rekomandime pozitive për të dy vendet në fund të majit në bazë të kritereve të vendosura unanimisht nga Shtetet Anëtare”, tha komisioneri Johannes Hahn.
Komisioni i BE-së do të paraqesë raporte mbi ecurinë e Shqipërisë dhe Maqedonisë së Veriut menjëherë pas zgjedhjeve evropiane që do të mbahen nga data 23 deri në 26 maj, teksa komisioneri Hahn u ka bërë thirrje vendeve anëtare që të mos kërkojnë më shumë kohë pas paraqitjes së raporteve pozitive.
