Ermal Mamaqi ka dhënë një lajm të mirë për fansat, pasi me gjasë mund të kemi një pjesë të dytë të komedisë “2 gisht mjaltë”. Pavarësisht se pritshmëritë ishin të larta, aktori e njëkohësisht moderatori ka thënë se çdo gjë ka shkuar mësë miri. Tashmë ekziston mundësia që të hidhen idetë mbi projektin e radhës.
Suksesi i komedisë “2 gisht mjaltë”, me protagonist Ermal Mamaqin dhe këngëtaren Elvana Gjata, pushtoi jo vetëm kinematë e vendit, por shkoi përtej kufijve.
I ftuar sot në “Dita Jonë” në A2 CNN, Ermal Mamaqi la të hapur idenë se mund të kishte një tjetër seri të “2 gisht mjaltë”. Ai tha se ishte surprizuar, e po kështu edhe ekipi realizues.
“E dija që do të funksiononte, por jo në këto nivele. Unë dhe ekipi realizues kemi mbetur të shokuar që në ditën e parë. U shitën 10 mijë bileta që në ditën e parë.
Kjo tregon që tregu ishte bosh dhe surpriza e njerëzve për filmin shqiptar… unë kam bërë pjesën time, por marketingun më të madh e kanë bërë vetë njerëzit. Në dy javët e parë janë shitur 150 mijë bileta në të gjitha kinematë”, shprehet Mamaqi.
I pyetur nëse do të ketë “2 gisht mjaltë” 2, Ermali iu përgjigj: “Pse jo. Siç e thash, kjo po kthehet në biznes dhe pse jo”.
