Ish-deputeti i Partisë Socialiste, Arben Ndoka ka kërkuar ditën e sotme revokimin e masës së sigurisë “arrest shtëpie” ne Gjykatën për Krimet e Rënda në Tiranë.
Kjo masë është dhënë gjatë hetimeve për çështjen “Vol-Vo 4”, operacion i cili u shtri në disa qytete dhe nga ku u arrestuan 34 persona, prej të cilëve 24 u lanë në burg.
Në tetor të 2018, me dy vendime të veçanta të Gjykatës së Krimeve të Rënda, janë arrestuar Arben Çuko dhe Arben Ndoka, ish-deputetë të Partisë Socialiste në Kuvendin e Shqipërisë.
Ndoka është arrestuar së bashku me të vëllain dhe një grup personash të tjerë që dyshohen për veprat penale ‘Falsifikimi i dokumenteve’, ‘Falsifikimi i vulave, stampave ose i formularëve”, “Shpërdorimi i tokës”, në kuadër të një grupi kriminal, të përfshirë në tjetërsim tokash.
Kujtojmë se emri i Arben Ndokës u lakua për një kohë të gjatë në vitin 2014, kur ai ishte deputet. Partia Demokratike publikoi në atë kohë dokumentet sipas të cilave Ndoka rezultonte të ishte dënuar në Itali, në fund të viteve ’90 me mbi 7 vjet burgim, për “shfrytëzim prostitucioni në rrethana të rënduara”, dhe se një pjesë të dënimit e kishte shlyer në burgjet shqiptare.
