Gjatë takimit në turin “Bashkia që duam”, Rama u kërkoi kuksianëve që këtë radhë, drejtimin e Bashkisë duhet që t’ia jepnin PS. Rama ka ironizuar ish deputetin e PD, Flamur Noka nga Kukësi, teksa tha “i nxirrej vota nga kutia këtij flamuri pa shkop këtu që ishte dhe ministër i Brendshëm, dhe polic”.
Gjatë fjalës së tij, Rama iu përgjigj opozitës për kërkesën e tyre për zgjedhje të parakohshme.
“Ne mundëm Saliun kur ishte në pushtet me gjithë hordhinë e tij, dhe nuk mundkemi Lulin. Zgjedhjet do të jenë më 30 qershor. E kanë bërë PD si agjensi turistike.
Rrugët ne kemi detyrë t’i mbarojmë, por nuk kemi detyrë të nxjerrim këta nga halli, kush i tha të ikin nga Parlamenti? Dhe mirë që ikën po pse duan të hyjnë çdo të enjte, ike, nuk do po ik pra, ça doni tani, edhe me zor, atje brenda ishin kush ju nxori?
Pas lutjeve Lulit, aman, aman, aman, u ulëm, e i dhamë gjysmën e qeverisë, mori Financat, Arsimin, të Brendshmen, të Shëndetësisë, Hipotekat, OSHEE, ALUZINI, Burgjet, se i duan gjithmonë burgjet, kur ishin në pushtet i nxirrnin kriminelët më të rrezikshëm nga burgu me leje lindje, del burri me leje lindje nga burgu? Jo po se do ti lindi një kushërirë, nuk ka rëndësi.
Ja më kujtohet edhe takimi këtu, unë flisja me ata poshtë, ata duartrokisnin lartë, si ti vodhën ata për pak nuk u hodhën nga kati i dytë për t’u bashkuar me ne”, përfundoi Rama.
