Vendimi i saj për të mos djegur mandatin, e ktheu në kohë reale në ‘armike’ të opozitës deputeten Rudina Hajdari. Për të, ndonëse një vendim mjaft i vështirë, është ndërmarë në interes të vendit.
Në fjalën e marrë në Kuvend, javës që lamë pas, deputetja e PD-së Rudina Hajdari u shpreh e sigurt se është në politikë për të bërë hapa të sigurt larg politikës së vjetër, siç tha ajo, dhe se askush nuk mund ta gjykonte për vendimet e marra. Ndërsa ngërçi është evident mes saj dhe opozitës së bashkuar, duket se një person ka arritur që ti bëjë bashkë.
Ambasadori i Bashkimit Europian në vendin tonë, Luigi Soreca, bashkë me përfaqësuesit e shteteve anëtare të BE kanë zhvilluar një takim sot në Tiranë.
Pjesëmarrës në të kanë qenë dhe anëtarë të opozitës, si Oerd Bylykbashi, Genc Pollo, Jorida Tabaku, Fatmir Mediu, Klajda Gjosha dhe Rudina Hajdari.
Kjo e fundit ka publikuar në ‘Facebook’ foto nga takimi, ku tregon se kanë diskutuar mbi situatën aktuale, krizën institucionale dhe mundësitë për zgjedhjen e saj.
“Një shkëmbim i hapur idesh dhe pikëpamjesh me kolegët e opozitës, dhe përfaqësues të shteteve anëtare të BE mbi situatën aktuale, krizën institucionale dhe mundësitë për zgjedhjen e saj. Prioriteti kryesor gjetja dhe zbatimi i rrugëve për të realizuar vullnetin e përgjithshëm të qytetarëve shqiptarë për anëtarësimin e Shqipërisë në Bashkimin Evropian”.
