Duket se nga hetimet paraprake, policia ka një të dyshuar për vrasjen e 26-vjeçarit Jurgen Kurti. I ftuar në studion e “Opinion”, gazetari Ermal Vija ka bërë me dije se policia ka identifikuar një nga autorët e dyshuar për vrasjen e Jurgen Kurtit.
“Policia ka shpallur në kërkim një person, por ende nuk dihet as identiteti, as mosha. Ka qenë kqyrja e kamerave që ka bërë të mundur identifikimin e një personi”, ka deklaruar gazetari, por pa dhënë shumë detaje.
Në orët e para të mëngjesit të së martës, ekspertë të policisë kanë mbërritur sërish në vendngjarje, për të verifikuar nëse zona mbulohet apo jo me kamera sigurie.
Mësohet se Kurti sapo kishte zbritur nga mjeti i tij, për t’u futur në banesë kur është qëlluar. Mbi trupin e viktimës u gjetën disa plumba, ndërsa në vendngjarje policia ka gjetur 10 gëzhoja.
Në lidhje me ekzekutimin e 26-vjeçarit, deri më tani policia ka hetuar në dy pista. Në atë të hakmarrjes, duke qenë se Kurti ishte i akuzuar si i përfshirë në një vrasje të ndodhur dy vite më parë në Durrës, dhe ajo e prishjes së pazareve të drogës.
