Thomas Strakosha nuk do të jetë në dy ndeshjet që ka zhvilluar kombëtarja kuqezi, përballë Turqisë dhe Andorrës. Edhe pse gardiani i Lazios ishte grumbulluar, ai nuk ka mundur të mbërrijë në orarin e caktuar dhe ti bashkohet grupit. Për këtë arsye trajneri Christian Panucci ka vendosur që ta lëri jashtë skuadrës për dy ndeshjet, një ndëshkim disiplinor.
Një situatë e sikletshme për Federatën Shqiptare të Futbollit, që nuk ka reaguar fare, ndërsa presidenti Armand Duka mesditën e së hënës deklaroi se aprovon vendimin e trajnerit, natyrisht duke mos dashur të shtojë tensionin në një moment kaq delikat.
Po vetë Strakosha? Asnjë fjalë, portieri kuqezi nuk ka qejf të flasë për mediat, sidomos në një moment të tillë, por një postim në Instagram paraditen e së hënës flet sa 1000 fjalë.
Strakosha ka postuar një foto ku shkruhet se po dëgjon këngën e reperit të famshëm Eminem, “Till i Collapse”, që në shqip përkthehet “Derisa të mos kem më forcë”, shoqëruar me flamurin e kombëtares. Më qartë se kaq…
