Qyteti i Sarandës vlon nga debatet se kush do të jetë pasuesi i Florjana Kokës si kandidat në krye të bashkisë së këtij qyteti.
Duket se do të jetë një sfidë e vështirë për socialistët të cilët kërkojnë një mandat tjetër për bashkinë e qytetit bregdetar kur në fakt, çështja nuk duket se është kaq e thjeshtë.
Mes anëtarëve të Asamblesë së Partisë Socialiste të qytetit të Sarandës janë duke u ravijëzuar tre kandidatura kryesore, që presin në fund fare edhe daljen e sondazheve të brendshme të socialistëve, por edhe verdiktin e të deleguarve të kryesisë së PS, Damian Gjiknurit si drejtues politik dhe Alket Hysenit si deputet i zonës.
I pari që përflitet është Ardi Kola. Aktualisht mban detyrën e kryetarit të Partisë Socialiste të qytetit të Sarandës. Me një të kaluar në fushën e sportit por edhe aktiv në strukturat e PS, luajti rol aktiv në ruajtjen e strukturave të PS, sidomos pas largimit të Koço Kokëdhimës nga influenca në parti për të mos lejuar përçarjen e saj.
Një tjetër emër që po diskutohet fuqishëm është ai i Alket Qendros. Drejtori aktual i tatimeve në qytetin e Sarandës shquhet për marrëdhëniet e mira që ka mbajtur me biznesin dhe dashamirësinë e treguar për qytetarët në zonë. Eshtë figurë potente për të cilën ka edhe lobim të madh.
Nuk mund të konsiderohet aspak surprizë rikthimi në diskutim i emrit të Stefan Çipës, një funksionar i rëndësishëm në Partinë Socialiste për një kohë të gjatë që ka shërbyer në shumë detyra, madje edhe atë të kryebashkiakut të Sarandës. Ai u spostua nga bashkia katër vite më parë, pasi ish-I deleguari Koço Kokëdhima vendosi kandidimin e Florjana Kokës, kryetares aktuale. Por çdo ditë e më shumë, Çipa është rikthyer në diskutim si një kandidaturë potenciale.
Pritet të ketë surpriza edhe në qarkun e Fierit për propozimet e Partisë Socialiste për kandidatët për kryetarë bashkish në këtë qark.
Gjithçka është bërë e qartë pas vizitës javën e kaluar të Kryeministrit Edi Rama në Fier, vizitë që u shoqërua edhe me përplasje të protestuesve me forcat e rendit, e ku si pasojë u lëndua një efektiv policie.
Por ndërkohë, veç zhvillimeve dhe aktiviteteve, pati edhe një pikëpamje të qartë për kandidaturat.
Në bashkinë e Fierit, PS do të rikandidojë edhe njëherë Armand Subashin, kryetarin aktual për një bashki të dytë. Në këtë qytet, PS ka investuar shumë, sidomos për infrastrukturën e brendshme, pastrimin e lumit Gjanica nga ndërtimet pa leje dhe kthimin e tij në një park për qytetarët, por edhe po punohet vrullshëm për nyjet hyrëse dhe dalëse të Fierit për të përfunduar para zgjedhjeve.
Në bashkinë e Lushnjes ka pikëpyetje për emrin e kryetarit aktual Fatos Tushe, i cili pretendon një mandat të tretë. Por duket se Rama ka vendosur për ndryshim. Dy janë emrat që përfliten aktualisht, ajo e kryetares aktuale të PS, Lindita Buxheli, dhe një tjetër kandidat suprizë. Flitet mes anëtarësisë së PS atje se një tjetër kandidat potencial është ai i gjyqtarit Artan Gjermeni që nuk mban teserën e PS.
Në Patos, vjen një emër suprizë në diskutim. Është deputetja e PS Antoneta Dhima që pritet të garojë nën siglën e PS duke hequr dorë nga mandat i deputetit.
Ndërsa në bashkinë e Divjakës, për shkak të lidhjeve të ngushta me Erion Braçen, të kryetarit aktual Fredi Kokoneshi, do të ketë një rikonfirmim të kandidaturës së këtij të fundit.
Të gjitha këto kandidatura do të bëhen të qarta në 23 qershor, ditë që do të mblidhet kongresi i Partisë Socialiste dhe do të hapet zyrtarisht fushata e zgjedhjeve vendore, edhe pse opozita nuk e ka vendosur ende nëse do të marrë pjesë në zgjedhje apo jo. /Newsbomb
