Ish-kryeministri Sali Berisha, ka reaguar lidhur me djegien e 5 makinave në Vlorë mbrëmjen e djeshme, teksa e ka demonstruar përmes fotove. Ai përçon mesazhin se krimi po sundon qytetin. Berisha thotë me ironi se krimi në Vlorë po festonte përgjysmimin e dënimit të Klement Balilit nga ana e Gjykatës.
Objektiv i zjarrit ishte makina e shefit të Urbanistikës në Bashkinë e Vlorës, Gentian Sherifaj, dhe e bashkëshortes së tij.
Mjetet kanë qenë të parkuara pranë njëra-tjetrës, në zonën e Ujit të Ftohtë, ku zyrtari banon, ngjarje e ndodhur një orë pas mesnate, rreth orës 01:00 të mëngjesit të sotëm.
Dyshimet e policisë janë për zjarrvënie të qëllimshme, por ende nuk është përcaktuar nëse makinave i është vënë flaka për shkak të detyrës që Sherifaj ushtron. Policia ka gjetur në vendin e ngjarjes dy bidona me benzinë, të cilat janë përdoruar nga autorët që kanë spërkatur automjetet.
Objektiv ka qenë djegia e makinës së zyrtarit të Bashkisë dhe bashkëshortes së tij, ndërsa djegia e tre automjeteve të tjera ka qenë aksidentale, si pasojë e përhapjes së flakëve.
