Nju Delhi, Indi (CNN) India deklaroi se ka kryer, gjatë mëngjesit të ditës së sotme, sulme ajrore në një kamp ushtarak terrorist në kufirin “de facto” midis Indisë dhe Pakistanit.
Në fakt sulmi ka ndodhur në rajonin e kontestuar të Kashmirit, në zonën e kontrolluar nga Pakistani. Ngjarja ka ardhur si pasojë e përshkallëzimit domethënës të armiqësive mes dy fuqive që posedojnë armë bërthamore.
“Sulmi u autorizua pasi autoritetet kishin ‘informacione të besueshme të spiunazhit’ për sulme të mundshme terroriste”, deklaroi Ministri i Jashtëm i Indisë, Vijay Gokhale sot në New Delhi.
Gokhale tha se kampi i bombarduar drejtohej nga Jaish – e – Mohammed, të cilin India e fajëson se në 14 shkurt 2019 kreu një sulm vetëvrasës me bombë në zonën Kashmirit të administruar nga India duke vrarë 40 ushtarë paramilitarë indianë.
Menjëherë pas njoftimit, Ministri i Jashtëm i Pakistanit, Shah Mahmood Qureshi, e paralajmëroi Indinë të mos sfidojë Pakistanin.
Po gjatë deklaratës të së sotme, Qureshi tha se India duhet ta kuptojë se Pakistani është “plotësisht i përgatitur për t’iu përgjigjur çdo fatkeqësie”.
Sipas gjeneralit pakistanez Asif Ghafoor, avionët indianë kaluan linjën e kontrollit mes dy shteteve dhe menjëherë u përballën me avionët pakistanezë të dërguar në zonë pas alarmit të shkeljes së kufijve. Po sipas burimeve ushtarake nga Pakistani, të ndjekur nga avionët e tyre, ata indianë nuk arritën dot shënjestrën, duke i lëshuar bombat në një zonë pa adresë, ku për fat nuk është shënuar asnjë viktimë.
Porse, në deklaratën e saj India zyrtare tha se “një numër shumë i madh” i militantëve u “eliminuan” gjatë operacionit ajror. India kishte pohuar më parë se kishte “prova të pakundërshtueshme” që Pakistani kishte “dorë të drejtpërdrejtë” në sulmin me bombë në Pulwama.
Pas sulmit, India u zotua për hakmarrje, duke përfshirë hapa ekonomike dhe diplomatikë për “izolimin” e Pakistanit ndërkombëtarisht.
Pakistani ka mohuar me forcë që të ketë një rol në sulmet.
Duhet veçuar se India dhe Pakistani janë përfshirë në disa raste në konflikte të armatosura, qysh pas ndarjes në vitin 1947 të Indisë Britanike në dy shtete – India dhe Pakistani, ku më e përgjakshmja ishte ajo e vitit 1971.
Po kështu duhet theksuar se të dy shtetet posedojnë armë bërthamore.
Përktheu dhe përgatiti TIRANA TODAY
