Një reagim në masë pati në rrjetet sociale dhe jo vetëm në lidhje me transmetimin e këngës “Ne jemi komunistë”, në valët e Radio Tiranës. Por video-ja e cila u bë virale, ka marrë edhe reagimin e Drejtorit të Përgjithshëm të Radio Televizionit Publik Shqiptar, Thoma Gëllçi.
Ai shprehet se janë marrë masat, dhe se nuk ka të bëjë aspak me çështje politike.
“Ishte një gabim i teknikut të Radio Tirana. Ai kishte futur gabim në listën e këngëve fituese edhe atë. Ishte gabim dhe u morën masat. Është një incident i shkëputur, nuk është politike”, tha Drejtori i Përgjithshëm i RTSH.
Kënga e transmetuar ditën e sotme në valët e Radio Tiranës me titullin “Ne jemi komunistë”, është kënduar nga Marina Grabovari, dhe ka fituar çmimin e parë të Festivalit në vitin 1982.
