Rezistencë e studentëve përpara Ministrisë së Arsimit ndërsa asaj i janë bashkuar dhe qytetarë të Tiranës. Kjo është dita e gjashtë që studentët protestojnë para Ministrisë së Arsimit dhe janë të vendosur që të mos tërhiqen. Studentët i kanë bërë të qartë kryeministrit Edi Rama se nuk janë të gatshëm as per dialog dhe negociata. Ata kërkojnë vetëm plotësimin e kërkesave të tyre.
Studentët kërkojnë plotësimin e 8 kërkesave dhe nuk pranojnë të negociojnë për ta.
Me thirrjet: “Turp! Do dalim në rrugë me qindra e mijëra, po s’u hoq tarifa rrëzohet ministria” studentët i janë përgjigjur dhe ftesës së kryeministrit për dialog për të zgjidhur kërkesat përmes transmetimit live në facebook.
Ndërsa për Ramën “është e qartë dhe duhet ta dëgjojnë të gjithë: unë jam me çdo student që do të ishte për veten e tij aty, jo për Lulin jo për Monikën dhe jo për komshinjtë, por për veten e tij dhe shtëpinë të ardhmen dhe prindërit e tij. Jam i vetëdijshëm që dikush është në kërkim të popullit që nuk e ka nga prapa për të hedhur benzinë në një zjarr që kërkon të ndezë”
Rama bëri me faj rektorët e universiteteve për VKM, dhe disa herë u përpoq të nënvizonte se nuk kishte lidhje qeveria me tarifat dhe nëse duheshin plotësuar kërkesat duhej dialog pasi qeveria nuk mund të ndërhynte pasi vendimmarrja ishte e Universiteve të cilat janë autonome.
Studentët nga ana e tyre shprehen se protesta është apolitike dhe shprehen të vendosur për plotësimin e 8 kërkesave: “S’ka negociata, vetëm vendimmarrje! “
Protesta është paqësore dhe studentët bëjnë thirrje për bashkim të qytetarëve por dhe studentëve të tjerë.
