Siç e paralajmëroi më parë kryeministri Edi Rama doli sot në një komunikim për mediat lidhur me protestën e studentëve. Në një konferencë e cila zgjati për më shumë se dy orë, Rama i bëri thirrje për dialog, duke thënë se veç në këtë mënyrë mund të zgjidhen problemet.
Por kjo deklaratë nuk gjeti mbështetje nga protestuesit,të cilët më të vendosur u shprehën për Tirana Today se nuk ka negociata pa plotësim kushtesh.
Në fjalën e tij Kryeministri i krahasoi studentët me Partinë Demokratike, duke thënë se çadra ishte i vetmi rast, kur nuk u pranua të dialogohej me qeverinë.
“Nëse do të bëjë negociata kryeministri ynë, le të vijë këtu, tavolina është aty dhe bisedimet do i bëjmë në shesh të burrave. Ne 8 pika kemi të parashtruara, ndërkohë gjithë pikat e tjera janë shtuar nga forumet partiake veç për të na përçarë. Ato të gjitha janë të rëndësishme, por më emergjente janë ulja e tarifave dhe përmirësimi i kushteve në konvikte.”
“Vdes Rama të politizojë situatën, ai atje është duke bërë monolog dhe jo dialog. Ne e kemi disa herë që nuk ka negociata pa plotësim kërkesash. Gjitha të tjerat çfarë bën e thotë ai, janë vetëm pallavra. Boll me Partitë Demokratike, Socialiste a LSI; nuk na duhet këto.”
“Ramës bravo i qoftë që ka gjetur atë opozitë të mbaruar. Por, ne nuk jemi njësoj me ata, s’kemi lidhje fare. Kryeministri me fjalët është i mirë, di të flasë me dhe pa kunja. Por, kur të tjerët i thonë që ke 8 kushte për të plotësuar, ato nuk kanë nevojë fare për dialog. Edhe pse unë mendoj se duhet të shtohet një tjetër kusht, për sekretaret se ato janë të tmerrshme.”
“Opozita ka hallet e veta, ajo mendon vetëm për pushtet. Ndërsa ne kemi tarifa që nuk po i përballojmë dot, veçanërisht ajo tarifa shtesë e cila ishte absurde.”
Studentët thonë për Tirana Today se e vetmja gjë që duan është t’i plotësohen 8 kërkesat. Kjo pasi nëse krijojnë një përfaqësi, ata druhen se qeveria do të ushtrojë presion mbi ta.
“Kryeministri Rama le t’i bëjë mbledhjet e Parlamentit në Facebook dhe të futet e Lulëzim Basha live. Kështu do jetë më mirë për shtetin, sipas tyre. Studentët janë këtu, ai ndoshta po diskuton me njerëzit e Fressh-it, por jo me ne. Ne nuk bëjmë negociata.”
“Këto ftesat për diskutime janë skema të vjetra qeveritare. E kemi parë dhe me protestën e Teatrit dhe me banorët e Astirit. Nëse një përfaqësi e jona shkon atje është e sigurt që ose do i ushtrojnë presion, ose do t’i blejnë në mënyra të tjera.”
“Ne i kemi kërkesat tona shumë të qarta, nuk kemi çfarë të diskutojmë me z.Rama. Ne këtu do të jemi deri sa ato të plotësohen.” TIRANA TODAY
