Duket se humbja e thellë 4-0 në stadiumin “Fadil Vokrri” nuk është përjetuar mirë nga futbollistët e Azerbajxhanit. Ishte një ndeshje vendimtare që vendoste se kush do të shkonte në finalet e Ligës së Kombeve dhe në fund nuk ishin favoritët, por Kosova.
Sulmuesi azer, Ruslan Gurbanov në një intervistë për median vendase “azerisport.com”, ka shpërthyer ndaj ‘Dardanëve’ me deklarata të forta. 27-vjeçari i lindur në Rusi, në deklaratën e tij ka lëshuar vrer ndaj shtetit të Kosovës që sipas tij Azerbajxhani bën mirë që nuk e njeh.
“Përkundër gjithçkaje, gjithmonë duhet të jeni njerëz, t’i respektoni vlerat e një vendi tjetër. Fakti që himni i Azerbajxhanit u fishkëllye në Kosovë tregon se ata nuk e respektojnë kundërshtarin. Shteti i Azerbajxhanit po bën gjënë e duhur, që nuk e njeh Kosovën, sepse ata nuk janë shtet, por të egër”, u shpreh 27-vjeçari.
