Kryetari i Partisë Demokratike Lulzim Basha ka folur sonte lidhur me debatin e javëve të fundit për dekretin e Sandër Lleshit.
I ftuar mbrëmjen e sotme në “360 Gradë”, të Artur Zhejit, Basha është shprehur se Lleshi është një vartës i Ramës dhe propozimi i tij dhe vendosja në këtë post, tregon kapjen totale të Ministrisë së Brendshme nga Edi Rama.
Kryedemokrati theksoi se Lleshi nuk i jep siguri vendit, marrë parasysh sipas kreut të opozitës, pasi në këto 5 vite që ka shërbyer si këshilltar i Ramës për sigurinë, vendi është “zhytur në krim dhe në drogë”.
“Ajo që po paralajmëroj sot është që emërimi apo jo i Lleshit, përfaqëson shkallën më të fortë të kontrollit dhe kapjes së Ministrisë së Brendshme nga Rama, në këtë fazë që i duhet më shumë për të mbyllur dosjet e hapura të Tahirit, Xhafajt apo të çështjeve të tjera që ka”, u shpreh Basha.
“Ajo që është zbuluar në këtë episod njëjavor, është kriza e shumëfishtë që po përjeton vendi e shqiptarët, dimension i krizës kushtetuese.
Ministria e brendshme është kontrolluar nga Rama dhe dërgimi i një vartësi të tij është akti i fundit që zbulon domosdoshmërinë që Rama ka për të kontrolluar këtë ministri. Në kuptimin politik është rënia e Ministrisë së Brendshme totalisht në dorë të Ramës për të mbrojtur veten, familjen dhe aleatët e tij.
Në këto 5 vite kanë mundësuar rekorde kriminale dhe nuk e kanë luftuar krimin dhe drogën, e tani është faza e pastrimit të parave të pista të krimit. Dërgimi i një vartësi i cili prej 5 vitesh ka qenë këshilltar për çështjen e sigurisë, ndërkohë që vendi është zhytur në krim dhe në drogë, nuk jep garanci por tregon se do të jetë një vartës i Ramës edhe më besnik se dy ministrat e parë.
Largimi i dy ministrave, Tahirit dhe Xhafajt, është një arritje e madhe e opozitës sepse asnjë opozitë tjetër nuk ia ka dalë të largojë dy ministra”, tha Basha.
Ndërkohë sa i takon protestës prej disa ditësh së banorëve të zonës së Astirit në Tiranë, Basha është shprehur se 317 familje pa nxirren nga shtëpitë me një kryq.
“Ka një ligj shpronësimi. Vlerëson pronat, paguan paratë. Jepet një kohë për të blerë një banesë të re. Si mund të shkosh në mes të natës dhe t’i nxjerrësh nga shtëpia? Pa ju dhënë një lek dëmshpërblim. Thjesht duke ju vënë një kryq tek dera e shtëpisë. Është e dhimbshme që të themi siç e përshkruani ju. Janë 317 familje. Si do të vinte ty sikur të ishte i afërmi yt? Nëse nuk e kuptoni se ku kemi ardhur, pa Gjykatë Kushtetuese, me prokurori të kapur dhe një kryeministër që ju vë kryq shtëpive, ju them hapni gojën”, u shpreh kreu i opozitës.
