Nga Anxhela Ferra
Mbrëmjen e të dielës, në fshatin Larushk të Fushë-Krujës ndodhi një shpërthim me tritol, në oborrin e shtëpive të Besim dhe Ramazan Muçës, gjyshit të Xhisiela Malokut. Këtë të fundit e takojmë teksa është duke dalë nga shtëpia me makinën e saj. Duke mos hequr syzet e saj “Gucci” dhe pa dalë nga makina e saj ‘Peugeot 208’, e cila kushton afro 8 mijë euro, ajo nuk duket aspak e shqetësuar. Ajo rrëfen për Tirana Today se e di kush është fajtori. Xhisiela akuzon drejtpërdrejtë Partinë Demokratike.
“Dëgjojmë një shpërthim, dal dhe shoh që e kishin hedhur pas makinës time. Nuk e kuptuam se nga erdhi, sigurisht që u trembëm, veçanërisht familjarët.
Sipas meje ky është një sulm i PD-së, nga askush tjetër. Jam e sigurt që janë ata sepse unë dola në media dhe thashë atë që ishte e vërteta, ata dolën bllof, edhe tani më sulmojnë mua për të fajësuar të tjerët. Nuk i trembem aspak këtyre sulmeve. Ndoshta e bëjnë që unë të kërkoj azil dhe të fajësoj njerëz të pafajshëm.”
Xhisiela ndër të tjera shprehet se personit të parë të cilit i ka kërkuar ndihmë pasi ndodhi ngjarja, ishte një nga kushërinjtë e Rexhep Rrajës. Sipas saj ata kanë një marrëdhënie shumë të mirë, madje ajo mund të shkojë në burg ta takojë ish-të dashurin.
“Nuk e di nëse do të bëjnë diçka më të madhe. Unë ndihma e parë që kam kërkuar ka qenë te kushëriri i djalit të Rrahmanit. Ai më tha që do të vinte patjetër, por tha se mediat mund ta marrin sikur po vinte për kërcënim. Absolutisht që nuk jam kërcënuar asnjëherë nga ato, i kam miq shumë të mirë. Unë te Rexhepi në burg nuk kam shkuar, por edhe mund të shkoj. Pasi ne i kemi sqaruar të gjitha.”
Edhe pse në daljet publike Xhisiela është shprehur se nuk punon dhe mbahet veç me të ardhurat e mamasë dhe familjarëve jashtë vendit, duket se e reja nuk ka probleme financiare. Por, ndryshe shprehen familjarët. Kamera e Tirana Today hyri në ambientet e shtëpisë, ku vëllai i gjyshit të Xhisielës teksa rrëfen ngjarjen, thotë se ‘mezi rrojnë me bukë’.
“Na vunë tritol këtu te shtëpia, por ne nuk dimë asgjë. Unë frikë nuk kam sepse nuk i kam bërë gjë ndokujt. Por, jemi të tronditur, nuk e kuptuam nga na erdhi. Ne nuk kemi asnjë të mirë materiale, madje mezi rrojmë me bukë.
Ne nuk e dimë se kush e vuri tritolin, as nëse ka qenë sulm ndaj Xhisielës apo jo. Ose kanë dashur t’i prishin makinën, por ne nuk kemi konflikte me asnjë njeri.”
Familjarët e Xhisielës e kanë të vështirë të flasin, ata thonë se gjithë këto histori, si edhe vëmendja nga mediat, po i shkaktojnë shumë stres. TIRANA TODAY
