Prej disa ditësh në media lajmi kryesor është historia e Xhisiela Malokut dhe lidhjes me ish-të dashurin Rexhep Rraja, djalin e deputetit social Rrahman Rraja. Ngjarje e cila po shoqërohet me thënie e kundërthënie, akuza dhe shumë pikëpyetje. Por, teksa partitë politike e trajtojnë çështjen në favor të vetin, djali shpëton pa u prekur, pasi vajza tërhoqi denoncimin, mediat mbushen me lajme, me Xhisielën çfarë ndodh? Sevim Arbana aktivistja e njohur shprehet për Tirana Today, se ky nuk është një rast ngacmimi seksual, por bëhet fjalë për dhunë.
Një dhunë e përjetuar jo vetëm fizikisht prej ish-të dashurit, por edhe prej institucioneve apo personave të pushtetshëm të cilët i bëjnë presion, apo mediave të cilat e përdorin rastin për përfitime.
“Është një dhunë e pastër e më të fortit ndaj më të dobëtit. Mjafton që t’i bëhet një kërcënim dhe njerëzve i mbyllet goja. Edhe me Xhisielën kështu ndodhi. Ajo ndodhet para një situate të tmerrshme, ku të gjithë institucionet që presupozohet të mbrojnë qytetarin, i dalin kundër një vajze.
Unë fajësoj shumë institucione, edhe media është një institucion shumë i fortë. Gazetari pa pikë profesionalizmi dhe ndërgjegje profesionale bën një intervistë “fake”. Duhet të kenë turp.
Është një rast që të gjithë duhet të flasin pa politikë. Nuk është ky vendi që PD të lahet, sepse opozitën nuk ka ‘sapun’ që e lan. Po ashtu edhe qeverinë. Kemi shumë deputetë të PS-së që janë gangsterë. Dhe ja ku doli ky i fundit, një deputet që vetëm tani e njohim si deputet. Por, ka një forcë dhe potencial aq të madh saqë të gjithë shkojnë dhe e mbrojnë.”
Arbana akuzon Prokurorinë dhe komisariatin e Fushë-Krujës si problematik dhe nuk i trajtojnë siç duhet rastet e denoncimeve të femrave për dhunë prej të dashurve apo bashkëshortëve.
“ Ne si shoqatë jemi në një konflikt të ashpër me Prokurorinë dhe Komisariatin e Policisë në Fushë-Krujë. Pasi kemi disa raste të grave që kanë denoncuar bashkëshortët e tyre dhe përsëri nuk kanë gjetur mbrojtje apo mbështetje. Këto institucione janë shumë problematike, po denigrojnë dhe mbajnë anën e kriminelëve.”
Shumë vajza nuk e denoncojnë dhunën apo ngacmimet seksuale, sepse kanë frikë për veten apo familjarët nëse hyjnë në konflikt. Po ashtu i druhen paragjykimeve që nga shefi i komisariatit, policëve, gjyqtari, avokati apo edhe shoqëria do ta paragjykojnë.
Aktivistja i bën thirrje të gjitha vajzave të cilat dhunohen apo përjetojnë ngacmime seksuale të flasin. Pasi kjo është e vetmja mënyrë që ato të shpëtojnë, edhe nëse është e vështirë që zëri i tyre të dëgjohet apo të merren masat. TIRANA TODAY
