Ky sezon turistik i ka gjetur tregtarët me xhepat plot, ndërsa nuk janë kursyer që të vjedhin pushuesit, duke mos u treguar çmimet abuzuese. Çmimet stratosferike kanë detyruar pushuesit që të shprehin haptazi shqetësimet e tyre. Një formë ka qënë ajo e rrjeteve sociale, ku të blesh një omletë 900 lekë, e një briosh 650 lekë, të bën ta mendosh dy herë nëse vitin tjetër do i kthehesh pushimeve në vendlindjen tënde.
https://tiranatoday.com/fotodhermiu-te-thyen-ne-mes-me-cmimet-e-larta-ja-sa-kushton-nje-omlete/
Teksa plazhet janë ‘zbrazur’ nga pushuesit shqiptarë, qeveria bën propagandën e përvitshme, duke apeluar tregtarët që të mos ngrenë çmimet. Nga ana tjetër e medaljes, biznesmenët vendosin ‘çmime të kripura’, për të arritur të mbulojnë shpenzimet e gjithë vitit për stafin e tyre. Por edhe sa do të zgjasë kjo situatë e nderë? A ka gjasa që shteti ti japë fund kësaj loje me bizneset, të cilat ‘torturojnë’ pushuesit shqiptarë?
Ministri i Turizmit, Blendi Klosi, ka takuar përfaqësues të bizneseve turistike në Velipojë. Duke bërë një pasqyrim të problematikave, Klosi u kërkoi atyre të jenë të ndershëm me çmimet, pasi “çelësi i suksesit të zhvillimit të turizmit, është balanca e çmimit me cilësinë dhe respektimi i ligjeve”.
“Shteti ashtu siç ju ka mbështetur në aktivitetin tuaj, do të jetë në kontroll që aktiviteti të mos jetë abuziv. Të keni në kujdes problematikat e lindura tashmë edhe nga dashakeqës të turizmit në Shqipëri, për rritjen e çmimeve, abuzimet me çmimet, prandaj do t’ju kërkojmë në radhë të parë juve që keni bizneset në këto zona, që të jeni shumë më transparentë me pushuesit, të keni në çdo restorant apo hotel, lista çmimesh të afishuara dhe biseda me turistët të jetë direkte, e sqaruar, përsa i përket çmimeve dhe do të vazhdojnë kontrollet përsa i përket ligjit, pasi unë mendoj që një dhe vetëm një është çelësi i suksesit; zbatimi i rregullave nga të gjithë”, tha ministri Klosi.
Sezoni turistik në Shqipëri, vjen gjithmonë edhe me një rritje absurde çmimesh. Urojmë që apeli i ministrit të mos shkojë në vesh të shurdhër!
