Policia italiane ka vënë në pranga një të ri shqiptar dhe një vajzë greke, pasi në makinë në të cilën ata po udhëtonin është gjetur një sasi e konsiderueshme lëndësh narkotike e llojit heroinë.
Çifti, djali shqiptar 21-vjeçar dhe një vajzë greke 18-vjeçare u vunë ne pranga pasi në makinën me të cilën kishin udhëtuar nga Greqia, u gjetën 30 kg heroine.
Çifti kishte zbarkuar në portin e Barit me traget. Ata udhëtonin me një makinë të vjetër, ku kishin fshehur plot 30 kilogramë heroinë nëpër tavolina të vogla portabël prej druri, të cilat i kishin vendosur në bagazh e në pjesën e poshtme të sediljeve të makinës.
Autoritetet e Guardia di Finanza dhe zyrtarët e Agjencisë së Doganave zbuluan se në secilën prej tavolinave të mbyllura, ndodheshin 56 pako drogë, të futura në një hapësirë prej pak centimetrash.
Dy korrierët u arrestuan dhe u dërguan në burgun e Barit dhe Tranit. Ndërsa autoritetet italiane vijojnë hetimet për të zbuluar prejardhjen dhe destinacionin e drogës së kapur.
