Ndërkohë që Shqipëria pret qershorin e vitit 2019 për nisjen e bisedimeve me Bashkimin Evropian. Zëvendëskryeministri dhe njëherazi Ministri i Brendshëm i Italisë, Matteo Salvini hedh poshtë gjithçka.
Sipas tij, zgjedhjet për në Parlamentin Evropian pranverën e vitit të ardhshëm, mund të sjellin ndryshime dramatike, të cilat mund të çojnë deri në shpërbërjen e BE-së, në formën që e njohim deri më sot.
Në një intervistë për gjermanen “Der Spiegel”, lideri i partisë së ekstremit të djathtë, Lidhja, në një koalicion qeveritar me Lëvizjen Pesë Yjet, tha se Italia do të refuzojë çdokënd që hyn në mënyrë të paligjshme në vend dhe kërkon azil, ndërsa mbështet ngritjen e kampeve për refugjatët jo vetëm në Afrikën Veriore por edhe në Ballkan, ku vendi më i përfolur është Shqipëria.
Zoti ministër, kancelarja Angela Merkel do të dëshironte të kthente pas në Itali azilkërkuesit që janë regjistruar më herët këtu, por që udhëtuan më pas drejt Gjermanisë. A jeni dakord me këtë qëndrim?
Zonja Merkel, tha se Italia nuk duhet të mbetet vetëm. Por tani duhet të bëhet bilanci i pasojave. Ne jemi në vendin e dytë pas Gjermanisë, kur bëhet fjalë për numrin e refugjatëve që kemi pranuar. Ne kemi grumbulluar më shumë se 140.000 aplikime për azil, dhe s’mund të pranojmë asnjë aplikim të vetëm shtesë. Përkundrazi, do të donim t’i shpërndanim disa.
Me këtë qasje, mund të kontribuosh në fundin e mandatit të Merkelit si kancelare…
Ne kemi nevojë për partnerë të besueshëm në Gjermani. Personalisht, unë nuk dua të shoh krizë apo rënien e qeverisë atje. Edhe pse pikëpamjet tona politike – dhe jo vetëm mbi çështjen e refugjatëve – janë mjaft të ndryshme. E njëjta gjë vlen edhe për politikat ekonomike, reformën bankare dhe suficitin e tregtisë së jashtme gjermane.
Ju keni folur për marrëveshjen tuaj me homologun tuaj gjerman Seehofer dhe atë austriak. Megjithatë të dy dëshirojnë t’i dërgojnë refugjatët në Itali…
Kjo është e vërtetë. Të dy flasin për mbrojtjen e kufijve, dhe për refuzimin e atyre që nuk kanë të drejtën e azilit. Por qëllimi ynë i përbashkët, nuk është thjesht të vendosim një shpërndarje të refugjatëve në Bruksel, por sidomos të mbrojtjes së kufijve të jashtëm të BE-së. Një sistem si ai me Turqinë në juglindje, duhet të vendoset edhe në Evropën Jugore.
Cila është thelbi i konfliktit?
Kur dikush në BE thotë se italianët duhet së pari të kujdesen për gjithçka, dhe pastaj të marrin ndihma, atëherë unë i them:së pari na ndihmoni, dhe pastaj mund të flasim për pjesën tjetër, për shpërndarjen e refugjatëve por edhe për bashkimin bankar, borxhin sovran, etj.
Ju thoni se anijet e menaxhuara nga OJQ-të, duke përfshirë edhe disa nga Gjermania, duhet të zhduken nga brigjet e Libisë?
Sigurisht, po. Ato po mbështesin trafikantët e qenieve njerëzore, dhe nxisin kalimin e emigrantëve përmes Mesdheut.
Dhe kush duhet të bëjë punën e kryer deri më tani nga organizatat humanitare?
Rojet bregdetare libiane, tuniziane apo egjiptiane.
A e konsideron veten Italia pjesë të “Aksit të të Vullnetshmëve”? A do të ishit gjithashtu në favor të instalimit të pikave të kontrollit në vendet jo-anëtare të Ballkanit?
A do të kjo thotë krijimi i kampeve të refugjatëve jo vetëm në Afrikën e Veriut, por edhe në Ballkan? Po.
Kohët e fundit, e keni quajtur arrogant presidentin francez Emmanuel Macron. Pse jeni mërzitur me të?
Francezët na bëjnë ne italianëve moral, por sipas statistikave, ata duhej të kishit pranuar prej kohësh 9.000 azilkërkues nga Italia. Ende sot, rojet kufitare franceze, patrullojnë të armatosura kufirin me Italinë, në Ventimiglia. Është e drejta e tyre ta bëjnë këtë, por të paktën mos na bëjnë më moral.
Aktualisht duket sikur BE-ja është më e ndarë se kurrë, mbi çështjen e emigracionit dhe jo vetëm. A ju shqetëson kjo?
Muajt e ardhshëm, do të vendoset nëse Europa ka ende një të ardhme në formën e saj aktuale, apo nëse e gjithë struktura është bërë tashmë e pavlerë. Dhe kjo s’ka të bëjë vetëm me buxhetin për 7 vitet e ardhshme. Vitin e ardhshëm, do të shohim zgjedhjet e reja të Parlamentit Europian. Dhe brenda një viti, do të shohim nëse Europa e bashkuar do të ekzistojë ende apo jo.
PËRSHTATI TIRANA TODAY
