Një grup artistësh i kanë dërguar një letër Presidenti Ilir Meta lidhur me shembjen e Teatrit dhe në vend të tij do të ngrihen dy kulla. Por, sot Meta ka reaguar lidhur me shqetësimin e tyre ku është shprehur se po e ndjek me vëmendje këtë shqetësim.
Reagim i Presidentit të Republikës, Sh.T.Z Ilir Meta
Presidenti i Republikës, Sh.T.Z Ilir Meta po ndjek me vëmendje të veçantë dhe në vijimësi shqetësimin e komunitetit të artistëve lidhur me problemin e godinës së Teatrit Kombëtar, të kthyer tashmë në një debat publik.
Presidenti i Republikës organizoi edhe një takim me një përfaqësi të artistëve kohë më parë dhe ka dëgjuar shqetësimet e sugjerimet e tyre për zgjidhjen e kësaj çështjeje të ndjeshme.
Presidenti i Republikës, bën thirrje për transparencë e dialog për këtë çështje dhe i bën apel Qeverisë dhe Bashkisë së Tiranës, të dëgjojnë sugjerimet dhe shqetësimet e komunitetit të artistëve e të dialogojnë në dobi të ruajtjes e promovimit të vlerave e trashëgimisë historike, kulturore e kombëtare.
