Janë zbardhur detaje të reja lidhur me sasinë rekord të kokainës të kapur sot jashtë Portit të Durrësit. Lënda narkotike vinte nga Kolumbia, ndërsa ishte porositur nga kompania ‘Arbri Garden’, në pronësi të shtetasit Arbër Çekaj.
Burime për Report Tv nga grupi hetimor i dosjes ‘kokaina’ bëjnë me dije se pronari i kompanisë, që porositi 613 kg kokainë, ndodhet jashtë vendit. Nga të dhënat e sistemit TIMS rezulton që Arbër Çekaj ka dalë nga Shqipëria prej më shumë se 3 javësh.
Edhe mbrëmjen e kaluar, kur është bërë operacioni dhe është zbuluar magazina me kokainë, ai nuk ka qenë në Shqipëri. Shqiptarja.com, ka raportuar se pronari i kompanisë ‘Arbri Garden’ ndodhet në Gjermani.
Kujtojmë se sekuestrimi sasisë së kokainës, është përshëndetur nga delegacioni i Bashkimit Evropian deh nga ambasada e Shteteve të Bashkuara të Amerikës në Tiranë.
Ndërkohë akuza të forta ka bërë kreu demokrat Lulzim Basha, i cili tha përmes një statusi në Facebook se shqiptarët janë në dilemë se kujt t’i besojnë Ramës apo Xhafajt. Sipas Bashës, ka patur qëndrime të ndryshme për të njëjtën çështje.