Një skandal i vërtetë është ajo që po ndodh në Butrint, ku ka nisur të ndërtohet një objekt pikërisht brenda Parkut Arkeologjik të Butrintit.
Edhe pse Butrinti mbrohet nga UNESCO, ndërtimi ka nisur ditën e djeshme dhe po kryhet pranë një nga mureve më të lashta që daton në shekullin e 7-8 p.e.s., siç duket edhe në videon e publikuar nga Tirana Today.
Ky skandal u denoncua dje edhe nga ish-kryeministri Sali Berisha me anë të një postimi në Facebook, ku shkruante se Rama po ndërtonte një vilë familjare brenda në Butrint.
Ndërkohë, pas denoncimit nga Berisha, reagoi dje edhe ministria e Kulturës, e cila pretendon se në Parkun Kombëtar të Butrintit nuk janë duke u kryer gërmime apo ndërtime të reja, por në bazë të vendimeve ligjore dhe teknike janë duke u përshtatur objektet ekzistuese me qëllim përdorimin e tyre për kryerjen e shërbimeve të standardizuara brenda Parkut.
“Ministria e Kulturës thekson se asnjë godinë e re nuk po ndërtohet në Parkun Kombëtar të Butrintit, por është duke u kryer përshtatja e ambienteve ekzistuese me struktura të përkohshme dhe në përputhje me të gjithë parametrat e parashikuara nga konventat e UNESCO-s”, thuhet në reagimin e ministrisë së Kulturës.