Thaçi: Mandati për formimin e qeverisë i takon fituesit

Presidenti i Kosovës, Hashim Thaçi saktësoi sot se mandatin për formimin e qeverisë e ka vetëm fituesi i zgjedhjeve të 11 qershorit.
‘Sa i përket mandatarit mendoj se gjithçka është e qartë. Fituesi është ai i cili lëviz drejt formimit të Qeverisë së Kosovës.
Them me përgjegjësi të plotë se do të respektohet në tërësi vendimi i Gjykatës Kushtetuese i vitit 2014 që gjithçka të bën të qartë sa i përket se fituesi e themelon Qeverinë natyrisht duke krijuar numrat e nevojshëm’, tha Thaçi.
Koalicioni i udhëhequr nga PDK me kandidat për kryeministër Ramush Haradinajn doli i pari, por nuk arrin që të formojë i vetëm qeverinë, pasi nuk e ka numrin e mjaftueshëm të mandatave.
Ndërkohë që në vendin e dytë u rendit Vetëvendosja me kandidat për kryeministër Albin Kurtin.