Pas mbledhjes së kryesisë së Partisë Lidhja Demokaratike e Kosovës, Isa Mustafa ka thënë se kanë bërë përgatitjet për zgjedhje dhe se janë marrë vesh me kryetarët e degëve për agjendat zgjedhore. Mustafa ka thënë, “sa i përket koalicioneve, PDK-ja nuk është në listë. Do të bisedojmë me ato parti që kemi besim. Me prishjen e koalicionit LDK-ja nuk është dëmtuar, është dëmtuar vendi”.
Ndërkohë ditë më parë, kreu i Aleancës për Ardhmërinë e Kosovës, Ramush Haradinaj, tha se në asnjë variant nuk do të bashkëpunojë me partitë të cilat e kanë sjellë vendin në këtë gjendje.
“Aleanca ka vija të kuqe me këto parti. Pra ne ia ofrojmë sovranit programin tonë. Deri më tani AAK-“Nisma”, duke shpresuar edhe në akter të tjerë qoftë të shoqërisë civile apo edhe të opozitës, mirëpo në asnjë variant nuk do të bashkëpunojmë me partitë në pushtet në mënyrë që të ndërhyjë në vendimin e qytetarit me votë”, ka thënë Haradinaj.
