Ka përfunduar takimi, i cili zgjati 70 minuta, mes kryetares së LSI, Monika Kryemadhi dhe zëvendës.ndihmës Sekretarit Amerikan te Shtetit, Mathew Palmer.
Përmes një prononcimi për mediat, Kryemadhi ka deklaruar se në bisedën e zhvilluar kanë diskutuar për luftën kundër korrupsionit dhe kapjen e shtetit.
Më tej, e pyetur nëse Palmer sugjeroi ndonjë zgjidhje për t’i dhënë fund tranzicionit shqiptar, Kryemadhi u shpreh se ai nuk erdhi për të zgjidhur konfliktet e vendit tonë.
“Z. Palmer nuk kishte ardhur për ti dhënë zgjidhje për sa i përket konfliktit. Mos harroni që hallet tona do ti zgjidhim ne shqiptarët vetëm me njëri-tjetrin”, tha Kryemadhi.
Reagimi i plotë:
Çfarë u diskutua në takimin me z. Palmer?
Diskutuam për situatën dhe sigurisht që unë nuk jam e autorizuar që të flas për takimin. Z. Palmer shprehu opsionet e veta nga këndvështrimet e tij. Ne shprehëm opsionet tona nga këndvështrimet tona.
Sigurisht që përputhen për sa i përket raportit të Departamentit Amerikan të Shtetit për luftën kundër korrupsionit, për kapjen e shtetit, për të gjithë problemet e tjera, por është shumë e rëndësishme vazhdimi i mëtejshëm për zgjidhjen përfundimtare dhe për ti dhënë fund tranzicionit shqiptar. Shqipëria e ka vendin në BE.
Ju dha një zgjidhje z. Palmer, znj. Kryemadhi?
- Palmer nuk kishte ardhur për ti dhënë zgjidhje për sa i përket konfliktit. Mos harroni që hallet tona do ti zgjidhim ne shqiptarët vetëm me njëri-tjetrin.
Kemi zgjidhje për këto halle znj. Kryemadhi?
Sigurisht që mendoj që viktimat e gjithë kësaj historie, janë shqiptarët nuk është Kryeministri.
