Kapja e sasisë së kokainës duket se nuk është një rast krejtësisht i izoluar, pasi edhe në të kaluarën kompania “Arbri Garden”, rezulton se ishte përfshirë në trafikun e kokainës.
Përfshirja e kompanisë në trafikun e lëndëve narkotike, ishte e njohur edhe më parë, pasi konkretisht 3 vite më parë, Policia e Durrësit kishte referuar materialet në Prokurorinë e Krimeve të Rënda, në lidhje me sekuestrimin e 90 kg lëndë narkotike të llojit kokainë.
Ndërkohë kujtojmë se ish-ministri i Brendshëm, Saimir Tahiri dhe kryeministri Edi Rama kishin informacion për kompaninë në fjalë. Sekuestrimi i 613 kg kokainë, është konsideruar si aksioni më i madh dhe sasia më e madhe e kapur ndonjëherë nga policia.
Gjithashtu sa për aksionin dhe autorësinë e kapjes së drogës, është polemizuar dhe ka patur mospërputhje deklaratash në nivel politik.
“Drejtoria e Policisë Qarkut Durrës. Seksioni për narkotikët, me datë 21.12.2015, referoi materialet hetimore në Prokurorinë për Krime të Rënda Tiranë, për vlerësim, sepse më datë 23.11.2015, në Guayaquil, Ekuador, në një kontenier me banane, është sekuestruar 90 kg. lëndë narkotike e llojit Kokainë, të destinuara për në Shqipëri, për subjektin “Arbri Garden”, me adresë Maminas, Durrës, me pronar shtetasin Arbër Selim Çekaj, i datëlindjes 05.04.1980, banues në Tiranë”-shkruan Faktor.al.
Në Ministrinë e Brendshme, ka një dosje të posaçme për aktivitetin kriminal të Arbër Çekaj të përpiluara nga ish-drejtuesit e Policisë së Shtetit, jo vetëm komunikatat operative, por edhe dosje të posaçme të pasurive të këtij grupi. Kryeministri Rama, më saktë zyrës ZOS i është dërguar në 2015 i njëjti material.
Krerët e shtetit, ish-ministri i Brendshëm Sajmir Tahiri dhe kryeministri Edi Rama kanë qenë në dijeni për akrivitetin kriminal të narkotrafikantit Arbër Çekaj.
Faktor.al ka prej ditës së ngjarjes që shkruan se ky person nuk është i panjohur për policinë e Shtetit dhe prokurorinë e Durrësit. Arbër Çekaj prej më shumë se dy vjetësh është njeri me probleme me drejtësinë shqiptare. Ai njihej nga policia dhe prokuroria prej vitesh.
Burime për Faktor.al bëjnë me dije se, më datë 23.07.2016, Prokuroria e Rrethit Gjyqësor Durrës hapi një hetim për shtetasin Arbër Selim Çekaj, i datëlindjes 05.04.1980, banues në Tiranë, me arsim 12 klasë, pasi në Maminas, qeni i tij raca “Kano Kors”, kafshoi shtetasin Reshat Zenel Metaliu, i datëlindjes 28.03.1962, banues në Maminas, me arsim 12 klasë, i cili pas mjekimit në spital u largua në banesë, raporton Faktor.al
Pronari i kompanisë “Arbri Garden” u shpall person në kërkim lidhur me sasinë rekord prej 614 kg kokainë me vlerë 180 milionë euro, që u sekuestrua mbrëmjen e 27 shkurtit në Durrës. Lënda narkotike hyri në Shqipëri për llogari të kompanisë shqiptare, që merret me importin e frutave nga Amerika Latine. Ky biznes është në pronësi të Arbër Çekaj, personi ky që tashmë është shpallur në kërkim nga policia.
