Ka shkuar në 70 numri i të prekurve nga COVID-19 në Shqipëri. Në Tiranë rezultojnë të infektuar 50 qytetarë. Fieri ndjek kryeqytetin me 7 raste. Pastaj vjen Durrësi me 5 qytetarë të infektuar ndërsa Lushnja, Elbasani, Rrogozhina dhe Kavaja kanë nga 2 qytetarë të prekur me COVID-19.
Në Spitalin Infektiv ndodhen të shtruar 35 pacientë. Tre prej tyre janë në terapi intensive, në situatë të njëjtë klinike. Ndërsa pjesa tjetër e të shtruarve në pavjon, sipas zv/ministres Mira Rakacolli janë në gjendje të stabilizuar deri në këto momente.
Rakacolli tha se po vijohet me testimin e rasteve të dyshuara si element i rëndësishëm për ndërprerjen e zinxhirit të transmetimit të infeksionit COVID-19. Për ta bërë këtë, ajo tha se një rol të rëndësishëm kanë edhe qytetarët.
Në vendin tonë, nga përhapja e pandemisë së koronavirusit kanë humbur jetën dy persona, një grua 73-vjeçare nga Durrësi dhe një 66-vjeçar nga Lushnja, i shtruar pranë Infektivit.
Të dy personat kishin pasur histori udhëtimi në Itali. Ndërsa dje, në vend u regjistruan 5 raste të reja. Të infektuar rezultuan 3 shtetas italianë dhe babë e bir nga Kavaja, përkatësisht 80 dhe 42 vjeç.
