Deputetja e opozitës parlamentare, Edlira Hyseni është përlotur ditën e sotme nga foltorja e Kuvendit, teksa fliste për pasojat tragjike që la tërmeti i 26 nëntorit.
Gjatë fjalës së saj në seancën plenare, Hyseni u shpreh se Durrësi ka nevojë të ngrihet sërish, pas kësaj tragjedie. Por, sipas saj është e rëndësishme që të rikthehet besimi. Po ashtu, Hyseni shtoi se mëngjesin e 26 nëntori nuk kishte ndarje politike, por të gjithë ishin në emergjencën për të shpëtuar.
“Unë jam prind, jam nënë dhe në këtë situatë patëm emergjencën të kujdeseshim për jetën. Në katër të mëngjesit nuk kishte ndarje politike. Njerëzit kanë humbur shumë në të gjitha drejtimet dhe sot Durrësi ka nevojë të rigjejë besimin. Durrësi ka nevojë për një shtet për një qeveri që do t’i përgjigjet, ka nevojë për dashuri. Unë nuk dua të besoj që do preken ato lekë për personat e prekur nga tërmeti”, u shpreh Hyseni.
