Emiljano Shullazi pritej të dilte sot para trupës gjykuese, por edhe këtë herë gjithçka ka dështuar. Seanca është shtyrë pasi nuk është formuar trupi gjykues, sepse Këshilli i Lartë i Gjyqësorit nuk ka komanduar ende një gjyqtar të tretë. Në sallën e gjyqit doli vetëm kryesuesja Saida Dollani dhe anëtarja Albana Boksi.
Gjyqtari i tretë është dorëhequr dhe s’ka më asnjë anëtar të Apelit për Krime të Rënda që mund të marrë pjesë në shqyrtimin e çështjes. Pritet që KLGJ të caktojë anëtarin e ri nga apelet e tjera.
Gjyqtari Nure Dreni u dorëhoq për shkak se kishte shqyrtuar një çështje tjetër në lidhje me Shullazin. Më herët është dorëhequr edhe Sokol Binaj.
Ndërkohë, Blerim Shullazi ka kallëzuar penalisht në prokurorinë e Tiranës gjyqtaren Saida Dollani për shpërdorim detyre. Lajmi konfirmohet nga avokatët e çështjes.
Mësohet, ndër të tjera se seanca e radhës do të zhvillohet më date 23 maj. Gjate procesit 5 gjyqtarë janë dorëhequr ndërsa një tjetër gjyqtar është shkarkuar nga Vettingu.
