Koronavirusi ka marrë 4000 jetë njerëzish në SHBA, ndërkohë Presidenti i Rusisë Vladimir Putin ka shprehur solidaritetin e tij ndaj këtij vendi.
Rusia ka dërguar në Shtetet e Bashkuara një aeroplan ushtarak me pajisje mjekësore, për ta ndihmuar në luftën kundër koronavirusit.
Televizioni shtetëror rus “Rossiya 24” shfaqi të mërkurën pamje të aeroplanit duke u nisur nga një bazë ushtarake pranë Moskës.
Përflitet se dërgesa është rezultat i një bisede telefonike që presidenti amerikan, Donald Trump, ka zhvilluar me presidentin rus, Vladimir Putin, më 30 mars.
“Trump e ka pranuar me mirënjohje këtë ndihmë humanitare”, tha zëdhënësi i Kremlinit, Dmitry Peskov.
Uashingtoni nuk e ka konfirmuar fluturimin e aeroplanit rus, por Trump ka folur për marrjen e ndihmës nga Rusia gjatë një konference për gazetarë.
Kujtojmë se në Rusi, numri i rasteve të konfirmuara me COVID-19 është rritur në ditët e fundit.
Sipas zyrtarëve rusë, numri i të infektuarve në këtë vend është 2,777, ndërsa 24 pacientë kanë vdekur.
