Vendi ynë është goditur nga katër tërmete me forcë 3.3 rihter gjatë natës. Edhe pse me fuqi të vogël, lëkundjet janë ndjerë për shkak se epiqendra ishte në zonën e Durrësit në tokë, por edhe në det.
Deri më tani janë konfirmuar 40 persona të vdekur, 658 të plagosur. Ky është bilanci tragjik i tërmetit të së martës, i cili është pasuar në ditët në vijim me lëkundje të tjera toke.
Pas dy netësh, ekipet e kërkim-shpëtimit kanë ndërprerë kërkimet në Thumanë, pasi personat e raportuar nga familjarët si të humbur janë gjetur, edhe pse të pa jetë.
Ndërsa kërkimet vijojnë në zonën e ish-Kënetës në Durrës, dhe në pallatin 6 katësh në lagjen numër 18, pranë Kryqit të Kuq në qytet. Aty po zhvillohen kërkimet për 6 persona të zhdukur.
Një ditë më parë, kryeministri Edi Rama shpalli gjendjen e jashtëzakonshme për qarqet Tiranë dhe Durrës. Ndërsa 27 nëntorin e shpalli ditë zie kombëtare.
