Rreth 34 mijë maturantë do t’i nënshtrohen sot provimit të tretë të Maturës Shtetërore, atë të matematikës. Provimi nis në orën 10:00 dhe përfundon në 12:30.
Sikundër në dy provimet e para, maturantët do të duhet të zbatojnë rregullat anti-covid. Në një klasë do të jenë 10-15 maturantë.
Nëse maturanti ditën e provimit do të jetë i infektuar me Covid, nuk do të futet në provim, por do të ketë mundësi që ta japë në sezonin e vjeshtës.
Maturanti nëse konstatohet me telefon, do të përjashtohet nga provimi. Ditën e provimit duhet të kenë me vete mjetin identifikues. Mbikëqyrja bëhet me përfaqësues të MASR, përgjegjës administrimi.
