Kontrolli i Lartë i Shtetit ka zbuluar mungesa të rënda të medikamentit Daratumumab 400 mg, një nga barnat më të rëndësishme për trajtimin e pacientëve me kancer gjaku. Sipas raportit të auditimit, pavarësisht planifikimeve dhe kontratave, pacientët kanë mbetur pa trajtim për periudha të gjata, duke cënuar drejtpërdrejt shëndetin dhe jetën e tyre.
Gjendja në farmaci: zero njësi
Në raport thuhet se më 13 mars 2025, “gjendja e barit në Inventar në sistemin SISP (Pentaho) paraqitet: zero njësi në Farmacinë Qendrore; dy njësi në Farmacinë e Sektorit Kapa”. E njëjta situatë u konstatua edhe më 28 mars.
Kontratat dhe planifikimi
QSUT kishte planifikuar Daratumumabin në sasinë 400 flakonë për periudhën 2024–2026. Në korrik 2024 u lidh një Marrëveshje Kuadër, ku përfshihej edhe ky bar, me kontrata për 400 njësi. Më 26 mars 2025, Drejtoria e Shërbimit Farmaceutik lidhi një kontratë të re për 4,000 flakonë, me afat 24 muaj.
Por, siç thotë KLSH, “përfundimi i fazës së auditimit deri më 26 maj 2025 ka evidentuar se bari ka qenë në gjendje zero nga data 22 prill 2025 deri më 20 maj 2025”.
Pacientët e dëmtuar
Auditimi dokumenton qartë pasojat tek pacientët. Në një rast, për periudhën 1 prill – 26 maj 2025, ishin kërkuar 906 flakonë Daratumumabi, por u dhanë vetëm 398, pra rreth gjysma e nevojës.
Në tabelën e raportit renditen 190 kartela pacientësh, prej të cilave 46 janë përsëritje, që do të thotë se pacientët janë lënë disa herë pa dozën e barit. Për shembull:
Një pacient me kartelë A163650 ka pasur 39 herë mungesë, me diferencë –103.5 njësi.
Një tjetër me kartelë A270271 ka pasur 37 herë mungesë, me diferencë –81 njësi.
Ndërsa pacienti me kartelë A233171 ka pasur 28 herë mungesë, me diferencë –74 njësi.
Përfundimi i auditimit
KLSH thekson se, pavarësisht lidhjes së kontratave dhe pagesave të kryera, “gjendja progresive e barit Daratumumab 400 mg deri më 26 maj 2025 është 0 flakonë në DMM dhe 520 flakonë në BF”. Pra, bari ka qenë i planifikuar dhe i kontraktuar, por nuk ka qenë i disponueshëm për pacientët kur ata e kishin më shumë nevojë.
Ky është një nga shembujt më dramatikë të raportit: një bar i shtrenjtë, i planifikuar, i kontraktuar dhe i paguar, që megjithatë mungon për javë të tëra, duke lënë dhjetëra pacientë me kancer gjaku pa imunoterapinë jetike.
