Vijojnë akuzat e Partisë Demokratike ndaj mazhorancës, sa i përket zgjedhjeve që u zhvilluan më datë 30 qershor.
Sekretari i Përgjithshëm i Partisë Demokratike, Gazmend Bardhi denoncoi sot një rast të ri, ku sipas tij në Bashkinë e Vaut të Dejës, pas djegies së materialeve zgjedhore procesi i votimit atje ka nisur me fletë votimi të falsifikuara.
“Votimet moniste të 30 Qershorit ishin prova e radhës, se me Edi Ramën nuk mund të ketë kurrë zgjedhje të lira dhe të ndershme. Komisioni Qendror i Vjedhjeve , nën urdhrat e Ramës, është përfshirë nga skandali në skandal. 3 janë skandalet më të mëdha, ku është kapur në flagrancë.
- Falsifikoi dhe manipuloi pjesëmarrjen në votime për llogari të propagandës së Edi Ramës.
- Falsifikoi rezultatin e votimeve në Bashkinë Elbasan sipas urdhrave të Taulant Ballës për të fshehur se për Elbasanin kishte më shumë vota për kandidatin sesa fletë votimi në kuti.
- Ka lejuar që në Vaun e Dejës të kryhet votim me fletë të falsifikuara dhe që nuk i dihet origjina e tyre. Ky i treti është një skandal i ri, për të cilin kemi në dorë disa dokumente që e provojnë atë”, u shpreh Bardhi.
Bardhi vazhdon më tej, duke deklaruar se ka prova që në orën 07:58 të mëngjesit fletët e rregullta të votimit nuk kishin kaluar ende në doganën e Hanit të Hotit, ndërkohë që votimet kishin nisur
“Dokumenti i doganës tregon se fletët e votimit kanë qenë në doganë në orën 7:58 të së dielës, ndërsa votimet kanë nisur në orën 7:00. Duke qenë se materialet zgjedhore u dogjën, KQZ vendosi në 28 qershor nxjerrjen jashtë përdorimit të të gjitha fletëve të votimit, rreth 40 mijë të tilla, të të gjitha materialeve të tjera zgjedhore, përfshirë lista, vula etj. Në orën 07:00 të 30 qershorit, u deklarua se edhe me angazhimin personal të deputetit Tom Doshi, person në listën e zeze të SHBA-së, gjithçka ishte në rregull, fletët kishin ardhur, materialet zgjedhore gjithashtu, dhe kishte nisur procesi i votimit në të gjitha QV e Bashkisë së Vaut të Dejës. E gjitha është një gënjeshtër. Është mashtrim publik me pasoja të rënda i KQZ-së. Sipas dokumenteve zyrtare, rezulton se fletët e votimit në orën 07:58 minuta të datës 30 Qershor kanë qenë ende në Doganën e Hanit të Hotit”, tha demokrati.
Ai kërkoi shpjegime nga anëtarët e KQZ-së se ku i kanë gjetur fletët e votimit me të cilat u votua në Bashkinë e Vaut të Dejës. Sekretari i Përgjithshëm i PD, ngriti pyetjet:
“Nëse në orën 8 të mëngjesit Fletët e Votimit ishin ende në Doganë, çdo shqiptar pyet sot me çfarë fletësh votimi nisi procesi i votimit në orën 7.00?
Sa zgjati procedura e dërgimit të tyre në KQZ, marrjes së tyre në dorëzim nga KQZ, nisjes për në KZAZ, shpërndarjes në çdo QV?
I gjithë dokumentacioni zyrtar mbi këtë çështje, fakton një skandal të jashtëzakonshëm, një proces privat dhe kriminal të kryer nga KQZ në bashkëpunim me KZAZ e Vaut të Dejës, për të cilën prokuroria duhet të kishte nisur menjëherë hetimet penale”, shtoi ai.
