Në një seancë dëgjimore në komisionin parlamentar të Ligjeve, Zv/kryeministri Erion Braçe raportoi mbi sjelljen dhe veprimtarinë e administratës shtetërore, gjatë zgjedhjeve të 30 qershorit. Ai tha se janë marrë masat për ndëshkimin e nënpunësve që u përfshinë në akte të dhunshme gjatë fushatës zgjedhore.
“Janë marrë masat për nisjen e procesit disiplinor, deri në largim nga administrata publike të nëpunësve që u përfshinë në akte të dhunshme gjatë fushatës zgjedhore”, tha më tej ai. Braçe ka sqaruar se gjatë orarit zyrtar të punës, është ndaluar pjesëmarrja në veprimtari politike.
“Gjatë orarit zyrtar të punës, është e ndalur pjesëmarrja në veprimtari politike, në fushatë zgjedhore ose parti politike. U monitorua po ashtu veprimtaria e nxënësve gjatë orarit mësimor, dhe nuk rezultoi asnjë rast i përfshirjes së tyre në fushatë elektorale”, tha Braçe.
Braçe shtoi se “jemi në fazën e mbledhjes së të dhënave, për hartimin e raportit përfundimtar i cili do të përfshijë gjithë periudhën zgjedhore”.
“Mirëpresim raportimin e rasteve kur këta nëpunës të administratës civile, janë përfshirë në akte gjatë procesit të administrimit zgjedhor të ndaluara nga ligji, dhe pa asnjë diskutim do t’i largojmë nga shërbimi civil”, tha Braçe.
